Össur Skarphéðinsson, utanríkisráðherra Íslands, fór í opinbera heimsókn til Alain Juppé, utanríkisráðherra Frakklands, þann 7. mars. Hann hitti einnig Jean Leonetti, evrópumálaráðherra, á vinnukvöldverði. Að auki hitti utanríkisráðherra Michel Rocard, en hann er sérlegur sendimaður forseta Frakklands í málefnum heimskautanna.
Aðildarviðræður Íslands við Evrópusambandið var eitt aðalumræðuefnið. Viðræðurnar hafa haldið áfram jafnt og þétt síðan þær hófust 26. júlí 2010, en þær byggja að mörgu leyti á aðild Íslands að Evrópska efnahagssvæðinu. Frakkland er jákvætt gagnvart aðild Íslands að ESB.
Málefni er snerta viðskiptatengsl landanna tveggja voru rædd, en þar má sérstaklega nefna Fransk-íslenska viðskiptaráðið. Ráðherrarnir sammæltust um að blása nýju lífi í þessi tengsl. Viðskiptaráðið verður endurvakið í næsta mánuði, með virku starfi bæði í Frakklandi og á Íslandi.
Ísland og Frakkland lýsa yfir vilja til að treysta samstarf sitt um málefni Norðurheimskautssvæðisins, sérstaklega þá rannsóknir á því sviði. Frakkland hefur komið sér upp sérþekkingu á sviðinu, sem á sér upphaf fyrir margt löngu og er víða viðurkennd. Fimm sameiginlegum verkefnum hefur verið ýtt úr vör:
Ráðstefna um Norðurheimskautssvæðið í París haustið 2012, undir formerkjum OECD, og samhliða ljósmyndasýning á verkum Ragnar Axelssonar.
Íslenskum vísindamönnum verður gert kleift að stunda rannsóknir á rannsóknarstöðvum Frakklands á Svalbarði og á Suðurskautslandinu.
Þátttaka franskra vísindamanna í rannsóknarverkefnum á vegum Norðurskautsráðsins sem hýst eru á Íslandi (PAME - Protection of the Arctic Marine Environment working group og CAFF - Circumpolar Arctic Flora and Fauna). Einnig styrking samstarfsverkefna Frakklands og Íslands.
Viljayfirlýsing mun bráðlega vera undirrituð um samstarf milli Háskóla Akureyrar og Université Pierre et Marie Curie (UPCM).
Aðgengi íslenskra vísindamanna að stóru alþjóðlegu rannsóknarverkefni (ACCESS) í umsjá UPCM, fjármögnuðu af Evrópusambandinu, um efnahagsleg og félagsleg áhrif loftslagsbreytinga á norðurslóðum.
Í málefnum Miðausturlanda voru ráðherrarnir að mestu leyti sammála, en þeir ræddu kjarnorkuáætlun Írana og ofbeldið sem almenningur verður fyrir af hálfu sýrlensku ríkisstjórnarinnar.
